O‘zbekiston Kubogi-2017 yarim finali dastlabki uchrashuvi yakunlangach, o‘yin yakuniga bag‘ishlangan matbuot anjumani bo‘lib o‘tdi. Matbuot anjumanining birinchi qismida qarshiliklar ustozi Ro‘ziqul Berdiyev ishtirok etdi va o‘yin haqida quyidagi fikrlarni bildirdi.

"O‘yinni o‘zlaringiz ko‘rdilaringiz, himoyada biz qo‘pol xatolarga yo‘l qo‘ydik. Oqibatda darvozamizdan uchta to‘p o‘tkazib yubordik. “Lokomotiv”  jamoasining kuchli taraflarini futbolchilarimizga ko‘p tushuntirgan edik, raqibimiz standart vaziyatlardan ham yaxshi foydalanishini uqtirgan edik. Afsuski, shunday vaziyatlarda diqqatimizni yo‘qotdik. Kurash davom etadi, finalga chiqishga imkoniyatimiz bor. Umid qilamizki, futbolchilarimiz Qarshidagi javob uchrashuvida, o‘z muxlislari ko‘z o‘ngida oxirigacha kurashadi. Bugungi yagona urgan golimiz, qaysidir ma’noda bizga ishonch bag‘ishladi.

Jamoamiz tarkibiga xorijlik futbolchi qo‘shib olish maqsadimiz bor edi. Bu amalga oshmadi. Kuchli legioner hujumchiini olishga imkoniyatimiz cheklangan. Bizga taklif etilayotgan o‘yinchilar esa qoniqtirmadi. Legioner futbolchi olishda adashmasligimiz kerak", — dedi R.Berdiyev.