Matbuot anjumanining ikkinchi qismida  “temiryo‘lchilar” ustozi Andrey Miklyayev quyidagicha fikrlarni bildirib o‘tdi:

"Ajoyib uchrashuv guvohiga aylandik. O‘zi aslida “Nasaf”ga qarshi bellashuvlar har doim shunaqa o‘tadi. Ushbu klub – o‘z jarima maydoniga qamalib oladigan emas, balki hujumkor o‘yin namoyish etadigan klublar sirasiga kiradi. Shu sababli bugun biroz himoya haqida o‘ylashimizga ham to‘g‘ri keldi. Ammo g‘alabaga erishdik. To‘g‘ri, 3:0 hisobi qayd etilganida yanada yaxshiroq bo‘lardi. Biroq futbolda nimalar bo‘lishini oldindan aytib bo‘lmaydi.

Mazkur qo‘lga kiritilgan g‘alabani yaqinda kasb bayramini nishonlaydigan “temiryo‘lchilar”ga bag‘ishlaymiz. Yakshanba kuni ushbu kasb egalari bayramini nishonlashadi. Ushbu g‘alaba ular uchun ayni sovg‘amiz bo‘ldi.

“Nasaf” bilan javob o‘yini qachon o‘tishi aniq emas. Shu sababli ushbu uchrashuvning tez orada o‘tgani ma’qulmi yoki keyinchalik tashkil etilgani yaxshimi – aniq bir gap ayta olmayman. Buning uchun dastavval taqvimga yaxshilab nazar solish kerak bo‘ladi. PFLda buning uchun mas’ul shaxslar bor. Ular kerakli muddatni belgilashadi", — dedi Miklyayev.