«Anji» va «Krasnodar» klubi sobiq yarim himoyachisi, hozirda Xitoyning «Shanxay SIPG» klubida o‘ynayotgan Odil Ahmedov Rossiya chempionatiga boshqa qaytmasligini ma’lum qildi.

«2011 yilda Londonning «Arsenal» klubiga o‘tishim mumkin edi. Albatta, bunday jamoada kim o‘ynashni istamaydi? Ammo o‘shanda «Anji» bilan shartnoma imzolagandim. Maxachqal’aliklar esa meni qo‘yib yuborishmagandi. O‘shanda Yevropa darajasidagi jamoa shakllantirilayotgandi.

Ikki yil avval APL jamoalaridan takliflar bo‘lgandi. Yaqinda esa «Nissa» meni o‘z safiga chorladi. «Krasnodar» Yevropa ligasi doirasida bu jamoaga qarshi o‘ynagandi. Nazarimda, shundan keyin fransiyaliklar menga ko‘z tikishdi. Hattoki, mavsum so‘ngida «Nissa» «Krasnodar»ga taklif bilan chiqdi.

Lekin, afsuski, «Krasnodar» bilan shartnomam bor edi, transfer narxi esa rossiyaliklarni qanoatlantirmadi. Buni tushunaman. Mening Xitoyga transferim barchani qanoatlantirdi, jumladan, «Krasnodar»ni ham. O‘z o‘yinchisini 500 mingga sotgandan ko‘ra, 5 millionga sotish yaxshi-ku, to‘g‘rimi? Rossiyaga boshqa qaytmasam kerak. «Shanxay»dan keyin o‘z Vatanimda o‘ynashni istardim. To‘g‘risini aytsam, Xalk ham qaytmasa kerak», — dedi Ahmedova 8news'ga bergan intervyusida.