«Анжи» ва «Краснодар» клуби собиқ ярим ҳимоячиси, ҳозирда Хитойнинг «Шанхай СИПГ» клубида ўйнаётган Одил Аҳмедов Россия чемпионатига бошқа қайтмаслигини маълум қилди.

«2011 йилда Лондоннинг «Арсенал» клубига ўтишим мумкин эди. Албатта, бундай жамоада ким ўйнашни истамайди? Аммо ўшанда «Анжи» билан шартнома имзолагандим. Махачқалъаликлар эса мени қўйиб юборишмаганди. Ўшанда Европа даражасидаги жамоа шакллантирилаётганди.

Икки йил аввал АПЛ жамоаларидан таклифлар бўлганди. Яқинда эса «Ницца» мени ўз сафига чорлади. «Краснодар» Европа лигаси доирасида бу жамоага қарши ўйнаганди. Назаримда, шундан кейин францияликлар менга кўз тикишди. Ҳаттоки, мавсум сўнгида «Ницца» «Краснодар»га таклиф билан чиқди.

Лекин, афсуски, «Краснодар» билан шартномам бор эди, трансфер нархи эса россияликларни қаноатлантирмади. Буни тушунаман. Менинг Хитойга трансферим барчани қаноатлантирди, жумладан, «Краснодар»ни ҳам. Ўз ўйинчисини 500 мингга сотгандан кўра, 5 миллионга сотиш яхши-ку, тўғрими? Россияга бошқа қайтмасам керак. «Шанхай»дан кейин ўз Ватанимда ўйнашни истардим. Тўғрисини айтсам, Халк ҳам қайтмаса керак», — деди Аҳмедова 8news'га берган интервьюсида.