Dortmundning "Borussiya" klubi Usmon Dembele va "Barselona" klubiga qat’iy shart qo‘ydi. Dortmundliklar qo‘ygan talabga ko‘ra, hujumchining transferi 26 avgustga qadar amalga oshirilishi kerak, aks holda muzokaralar kelasi yilning yoziga qadar to‘xtatiladi.

Shu tariqa, "Borussiya" 20 yoshli fransiyalik futbolchiga bosim o‘tkazib, uning jamoaga qaytishiga majbur qilmoqchi. Ammo undan oldin jamoa Usmondan barcha oldida uzr so‘rashini talab qilmoqda.

Futbolchining o‘zi esa "Borussiya"ning talabini bajarmoqchi emas. Uning ta’kidlashicha, futbolchiga yaxshi taklif tushsa, jamoa uni qo‘yib yuborishi borasida tomonlar o‘rtasida kelishuv bo‘lgan. Usmon Dembele klubdan o‘z va’dasida turib, o‘zini "Barselona"ga qo‘yib yuborishini talab qilmoqda.

Kataloniyaliklar hozircha futbolchini xarid qilishdan uzoq turishibdi. Asosiy muammo — o‘yinchining narxida. "Borussiya D" o‘z hujumchisining transferidan 150 mln yevro daromad olmoqchi. Ammo "Barselona" 100-105 mln yevro atrofida pul berib, qo‘shimchasiga 20-25 mln yevro bonuslar va’da qilsa, tomonlar 130 mln yevro atrofida bir to‘xtamga kelishlari mumkin.