Oliy liga 18-turidan o‘rin olgan «Dinamo» - «Paxtakor» (0:0) uchrashuvidan so‘ng «Dinamo» bosh murabbiyi Oleg Tyulkin jurnalistlar savollariga javob qaytardi.
- Bugun maydonda mardonavor kurashlar va ochiq futbol guvohiga aylandik. Bunday o‘yin har qanday muxlislarga yoqadi. Chunki hech kim bugun bir-birini ayamadi, oxirigacha kurashdi. Oldingi mag‘lubiyatimizga qaramay, e’tibor bering qancha muxlis stadionga keldi. Samarqand ahli bizga ishonayotgani uchun ham bugun muxlislar uchun maydonda bor kuch va imkoniyatimizni ishga soldik. Bizni ajoyib qo‘llab-quvvatlashgani uchun ularga rahmat.
- Bugungi durangdan 1 ochko qo‘lga kiritildimi yoki 2 ochko yo‘qotildimi?
- Shubhasiz, ikki ochko yo‘qotdik. Bugun «Paxtakor»dan ko‘ra, «Dinamo» g‘alabaga yaqin edi. Ko‘rdingiz, mehmonlar aytarli vaziyatga ega bo‘lishmadi, futbolchilarimiz kuchli pressing va himoyada barqaror o‘yin namoyish etishdi. Agar birinchi bo‘limda Amirjon Safarov va Sardor Sulaymonovlar ajoyib imkoniyatlaridan foydalanishganida bugun «Paxtakor»ni mag‘lub etgan bo‘lardik. Ammo o‘sha vaziyatlarda Lobanov jamoasini qutqardi. Shunga qaramay, durang uchun ham yigitlarimizga katta rahmat deymiz. Ular ko‘rsatmalarni to‘g‘ri bajarishdi. Bugun «Paxtakor» emas, «Dinamo» ikki ochko yo‘qotdi.
- Bugun «Paxtakor»ga qarshi «Dinamo» ajoyib o‘yin namoyish etdi. Oldingi ochkolar yo‘qotilgan ikki o‘yinda «Metallurg» va «Sho‘rtan» bilan shunday o‘yin namoyish etishga nima to‘sqinlik qilgandi?
- Ikkinchi davra oldidan tarkibimizda o‘zgarishlar bo‘lib, to‘rt nafar yangi futbolchilar kelib qo‘shilishgandi. Shu bois biz optimal tarkibni aniqlab olishimiz qiyin kechdi.
- Farhod Tojiyev Samarqandda oldin o‘ynagan bo‘lsada, jamoa o‘yiniga moslashish qiyin kechayotgandek?
- Farhod tajribali futbolchi va jamoaga yordami tegadi. Bugun ham ikkinchi bo‘limda maydonga tushib, ko‘rsatmalarni aniq bajardi. Farhod tobora o‘yinimizga moslashib, hali o‘z so‘zini aytadi.
- Amirjon Safarov jarohat olib, maydonni erta tark etdi. Uning holati borasida nima deya olasiz?
- Amirjonning oldingi jarohati qayta qo‘zg‘alganga o‘xshaydi. Hozircha aniq ma’lumot yo‘q. Tibbiy ko‘rikdan keyin uning holati qanday ekanligi ma’lum bo‘ladi. Umid qilamanki, Amirjonning jarohati jiddiy emas. U keyingi o‘yingacha jarohatini davolatib, safga qaytishi kerak. Qolaversa, Saidjamol Davlatjonov ham «Navbahor»ga qarshi bahsda safga qaytadi.
- Oldinda «Dinamo»ni «Navbahor», «Qo‘qon-1912», «Buxoro»ga qarshi qiyin o‘yinlar kutib turibdi. Optimal tarkibni aniqlayapmiz dedingiz. Bugun namoyish etilgan ajoyib o‘yindan kelib chiqib aytadigan bo‘lsak, ushbu tarkib optimal tarkibga aylanadimi?
- Yo‘q, hali bunday deyishga erta. Bizda barcha 18 talik ro‘yxatimizga kirgan har bir futbolchi asosiy tarkibga kirish uchun loyiq futbolchilardir. Ularning qay biri o‘yinga yaxshiroq tayyor bo‘lsa, o‘sha tarkibga tushadi. Biz optimal tarkibni izlashda davom etamiz.
- «Dinamo»ning standart vaziyatlardan foydalanish koeffisiyenti juda pastligicha qolmoqda. Mashg‘ulotlarda bu borada ishlar to‘g‘ri olib borilayaptimi?
- To‘g‘ri aytdingiz, standart vaziyatlardan foydalanish bobida oqsayapmiz. Mashg‘ulotlarda bu borada alohida shug‘ullansakda, negadir maydonda buni ko‘rsata olmayapmiz. Xato va kamchiliklar ustida ish olib borib, ishlashda davom etamiz.
