1967 yili «Futbol» haftanomasida maxsus maqola chop etildi. Unda 100ta va bundan ko‘p gol urgan to‘purarlar ramziy klubini shakllantirish g‘oyasi ilgari surilgandi.

O‘sha vaqt «Futbol» muharriri sifatida ishlagan Lev Filatov keyinchalik bu borada shunday degandi: «1967 yilning kuzida Konstantin Yesenin tahririyatga 100ta yoki ko‘proq gol urgan futbolchilar ro‘yxatini olib keldi. O‘shandayoq ramziy klubga Grigoriy Fedotov nomini berganmiz. Chunki aynan u 1948 yili chempionat tarixida birinchi bo‘lib 100ta gol marrasiga yetgandi».

Ayni payt «Fedotov klubi»ni sobiq ittifoq terma jamoasi va «Dinamo» (Kiyev) klubi afsonaviy hujumchisi Oleg Bloxin boshqarmoqda. Uning hisobida yuqori darajada urilgan 319ta gol bor. Ro‘yxatda 3 nafar sobiq «paxtakorchi»ni ko‘rishimiz mumkin. Ramziy klubga futbolimiz vakillaridan birinchi bo‘lib Gennadiy Krasniskiy kirgan. U chempionat bahslarida 102ta, sobiq ittifoq terma jamoasi safida 1ta va kubok o‘yinlarida 7ta gol urgan. Ya’ni umumiy hisobda 110ta golga ega. Birodar Abduraimov hisobida 105ta gol bor (95tasi chempionatda, 10tasi kubokda urilgan). 1980 yillarda «Paxtakor» sharafini himoya qilgan Andrey Yakubik esa raqiblar darvozasini 117 marta ishg‘ol qilgan. U chempionat bahslarida 105ta (shundan 70tasi «Paxtakor» safida), yevrokuboklarda 3ta va kubok bahslarida 9ta gol urgan.

Vladimir Safarov.