Oliy liganing 20-turidan o‘rin olgan "Obod" - "So‘g‘diyona" (2:4) uchrashuvidan keyin mezbonlar ustozi Andrey Demchenko o‘z fikrlari bilan o‘rtoqlashdi.
"Uchrashuvda birinchi bo‘lib gol o‘tkazib, keyin uni g‘alabaga aylantirganimiz kishini qanchalik xursand qilgan bo‘lsa, yakunda hatto durangni ham ushlab qola olmaganimiz, shunchalik xafa qildi. Vaholanki, biz shu kuni maydonga faqat g‘alaba uchun chiqqandik va qolaversa, bunga loyiq o‘yin namoyish qilgandik, biroq ayrim sabablar yakunda bir ochkodan ham mahrum bo‘lishimizga olib keldi.
Xo‘sh qanday sabablar? E’tibor bergan bo‘lsangiz, hisobda oldinga chiqib olganimizdan keyin yigitlar hujumga o‘tib ketishdi va o‘z-o‘zidan himoyada bo‘sh zonalar paydo bo‘ldi. Raqib bundan unumli foydalandi. Darvozamiz tomon yo‘llagan aniq zarbalarining deyarli 95 foizi golga aylandi. Hujumga o‘tdik, ammo himoyada tartibli harakat qila olmadik. "Konsentrasiya"ni yo‘qotdik. Boz ustiga, yigitlarga charchoq alomatlari ham kuzatildi. Balki bellashuv 16:00da boshlangani ham bunga sababdir?! Yana bilmadim. Eng asosiysi sabab shuki, o‘z xatolarimiz tufayli g‘alabani qo‘ldan chiqardik" - dedi Demchenko.
