“Nasaf” – “Lokomotiv” uchrashuvi yakunlangach o‘yin yakunlariga bag‘ishlangan matbuot anjumani bo‘lib o‘tdi.

Matbuot anjumanining dastlabki qismida “Lokomotiv” jamoasi ustozi Andrey Miklyayev ishtirok etdi va quyidagi fiklarini bildirib o‘tdi.

-So‘zimni boshida “Nasaf” jamoasini bugungi g‘alaba bilan tabriklayman. Shuningdek Berdiyevni O‘zbekistonda xizmat ko‘rsatgan sport ustozi unvoni bilan taqdirlangani bilan ham muborakbod etaman.

Albatta bu yuksak unvon, bu biz uchun ham yoqimli. Bu Prezidentimiz SH.M.Mirziyeyovning biz murabbiylarga bo‘lgan katta e’tiborlari deb, bilaman.  

Endi bevosita o‘yinga to‘xtaladigan bo‘lsam, bugungi o‘yin muxlislarga juda yoqdi deb, o‘ylayman. Har ikkala jamoa chiroyli va shiddatli o‘yin namoyish etishdi. Ular hammamizni hayajonda ushlab turishdi, To‘g‘risi, 90 daqiqa qanday o‘tib ketganligini o‘zim ham sezmay qoldim.

Albatta bunday muhitda, bunday stadionda va maydonda o‘ynash har qanday jamoa uchun yoqimli. Ammo afsuski biz bugun dastlabki 10 daqiqada o‘yinni berib qo‘ydik, bunda maydon egalarining ko‘rsatgan katta bosimiga qarshi tura olmadik.

Xatomiz tufayli hisobda orqada qoldik. Shundan so‘ng o‘yin barqarorlashdi. Hattoki hisobni tenglashtirishda imkonlar ham bo‘ldi. Ammo bugun bizga omad yetishmadi. O‘yin oxirida biz tavakkal qilishga majbur bo‘ldik.

Hisobni tenglashtirish uchun hujumga o‘tib ketdik. Bunda himoyada xatoga yo‘l qo‘ydik, oqibatda darvozamizdan ikkinchi golni o‘tkazib yubordik.

O‘yinda “Nasaf” futbolchilari bizga nisbatan g‘alabaga haqliroq o‘yin ko‘rsatishdi.