O‘zbekistonlik futbol mutaxassisi Alisher Nikimbayev 2014 yilning 4 oktyabr kuni bo‘lib o‘tgan voqeani yodga oldi va bu haqda Facebook sahifasi orqali ma’lumot berdi.

Unga ko‘ra, Nikimbayev shu sanada O‘zbekiston milliy terma jamoasi bosh murabbiyi Mirjalol Qosimov va taniqli mutaxassis Bora Milutinovichni uchrashtirish uchun Dohaga uchib borgan. Ikki tomon o‘zaro fikr almashgan va bitta jamoada ishlashga kelishgan. Ya’ni, Milutinovich O‘zbekiston milliy terma jamoasida maslahatchi murabbiy bo‘lib ishlashga rozilik bergan.

Biroq na serbiyalik mutaxassis, na Mirjalol Qosimov va na Alisher Nikimbayevga bog‘liq bo‘lgan sabab tufayli, kelishuv yakuniga yetmay qolgan. Bunga aynan kim sabab bo‘lganini Nikimbayev ochiqlamagan.

O‘zbekiston milliy terma jamoasi uchun foydali bo‘lishi mumkin bo‘lgan safarning borish va kelishi uchun Nikimbayev o‘z yonidan chipta xarid qilgan hamda Abu-Dabidan yo‘lga chiqqan. Ko‘rinishidan, O‘FF terma jamoalar markazi o‘sha vaqtlarda Nikimbayevning harajatlarini ko‘tarmagan. «Bu — so‘nggi yillarda bizning futbolda kim va qay tariqa ishlagani haqidagi kichik fakt edi», — deb yozgan Nikimbayev.

Bora Milutinovich bir emas, besh terma jamoa bilan Jahon Chempionatida ishtirok etgan dunyoning yagona murabbiyi hisoblanadi: Meksika (1986), Kosta-Rika (1990), AQSH (1994), Nigeriya (1998) va Xitoy (2002).