CHL guruh bosqichi 2-turidan o‘rin olgan «Beshiktosh» - «RB Leypsig» o‘yini 2:0 hisobida mezbon jamoa g‘alabasi bilan yakunlandi.
Istanbulda joylashgan «Vodafon Arena» stadionida bo‘lib o‘tgan bu uchrashuvda diqqatni tortadigan 2ta voqea kuzatildi. Birinchisi - mehmonlar vakili Timo Verner tribunalar shovqiniga chidolmadi, ikkinchisi - chiroqlar kutilmaganda o‘chib qoldi...
«SE» nashrining quyidagi maqolasi shular haqida.
Atrofda shovqin
«Jahannamga xush kelibsiz» - bu yozuv Istanbuldagi «Ali Sami Yen» arenasi kirish darvozasini «bezab» turardi. Ya’ni 2011 yilga qadar ushbu arenadan foydalangan «Galatasaroy» klubi raqiblarni shunday «muloyim»lik bilan qarshi olardi. Poytaxt jamoasining yangi uy stadioni - «Turk Telekom Arena» ehtiroslar tug‘yoni bobida o‘z vorisidan sira qolishmaydi. Biroq joriy mavsum Yevropani turk «jahannami» bilan tanishtirish boshqa stadion - «Vodafon Arena» chekiga tushdi. Ochig‘i, Turkiyaning amaldagi chempioni maydonidagi uchrashuv ishtiyoqli «RB Leypsig»ga haqiqiy sinov onlarini taqdim etdi. Hakamning start hushtagi chalingani hamono «Vodafon Arena» tribunalarida shunday shovqin ko‘tarildiki, ta’bir joiz bo‘lsa, nemis klubi vakillari quloqlarini qo‘llari bilan bekitib olishdan o‘zga chora topolmadilar, go‘yo. Ayniqsa, hujumchi Timo Verner juda qiynaldi - yuqori desibel (shovqin o‘lchovi)ga moslasholmasligini tushungan 21 yoshli futbolchi quloqqa qo‘yiladigan maxsus himoya vositasi (ovoz pasaytirgich) so‘radi, biroq uning nafi ham sezilmadi, shekilli. Xullas, o‘zini yomon his etgan Verner 32-daqiqada murabbiylar shtabidan o‘rniga zaxiradan futbolchi tushirishini iltimos qildi. O‘yindan keyin futbolchi yuzaga kelgan holatga alohida to‘xtaldi: «Umrim bo‘yi hech qachon bunday manzarani ko‘rgan emasdim. Tan olaman, barchasidan ko‘z yumib, o‘yinga e’tibor qaratish uddasidan chiqolmadim. Hattoki, maxsus vosita ham yordam bermadi. Ishoninglar, haligacha o‘zimni noxush sezyapman». «Leypsig» bosh murabbiyi Ralf Xazenxyutl esa shunchaki, shogirdi yonini oldi: «Futbolchilarni bunday holatga tayyorlash - ilojsiz ish. Odamni kar qiladigan shovqin va tan olaman, u boshida butun jamoamni izdan chiqardi...».
Ichkari yorug‘, faqat...
«Eshitish» qobiliyatidan mosuvo bo‘lgan «Leypsig» barchasiga qiyinchilik bilan moslashgunicha mezbonlar bir qator xavfli hujumlar tashkil etib, tanaffusgacha 2ta gol quvonchini tuyishdi. Muxlislar ikkinchi 45 daqiqalikda gol ko‘rishmadi, ammo CHL oqshomining o‘zgacha go‘zal lahzalari ishtirokchilariga aylanishdi. Gap shundaki, o‘yin davom etayotgan pallada «Vodafon Arena» chiroqlari va projektorlari kutilmaganda, o‘chib qoldi. Natijada maydonni zulmat qopladi va bosh hakam Sergey Karasyov jamoalarni chetga chiqardi. Shu tariqa o‘yin naq 12 daqiqa to‘xtab qoldi. Bu vaqtda tribunalarda ajib bir manzara yuzaga keldi - smartfonlar ekranlaridan taralgan turli-tuman nurlar yog‘dusi. Bu manzara ko‘zda tutilmagan tanaffusni yana biroz cho‘zishga ham arzirdi. Elektr ta’minotidagi uzilish sabablari bartaraf etilib, projektorlar qayta nur sochgach, futbolchilar o‘yinni davom ettirishdi va «Beshiktosh» ijobiy natijani saqlab qolib, «G» kvarteti peshqadami bo‘lib oldi. «Vodafon Arena» esa Turkiyada allaqachon ommalashgan o‘ziga xos shiorni o‘ziniki qildi - «Jahannamga xush kelibsiz».
