Joriy yilning 6-8 oktyabr kunlari Toshkent shahri dunyoning eng kuchli dzyudo ustalarini jamlaydi.
Poytaxtimiz mezbonlik qiladigan Gran-pri turnirida dunyoning 32 mamlakatidan 215 nafar dzyudochi ishtirok etadi. Musobaqada yurtimiz sharafini 56 nafar sportchimiz himoya qiladi.
Ushbu sport anjumani Xalqaro dzyudo federasiyasi musobaqalari taqvimiga kiritilgan Gran-pri turkumidagi nufuzli xalqaro turnirdir. Xalqaro federasiyasi qaroriga ko‘ra, dzyudochilar yuqori nufuzli turnirlarda reyting ochkolarini jamg‘arib boradi. Sport olamining eng nufuzli musobaqasi – Olimpiya o‘yinlari ishtirokchilari ham aynan ana shu reyting jadvali asosida saralanadi.
Bu yilgi Toshkent Gran-prisida ham dunyoning qator mamlakatlaridan eng sara dzyudochilar gilamga chiqishi kutilmoqda. Ular orasida Olimpiya o‘yinlari, jahon va qit’a chempionatlarida g‘olib va sovrindor bo‘lgan sportchilarning borligi bellashuvlarning keskin va murosasiz o‘tishiga xizmat qiladi.
