Жорий йилнинг 6-8 октябрь кунлари Тошкент шаҳри дунёнинг энг кучли дзюдо усталарини жамлайди.
Пойтахтимиз мезбонлик қиладиган Гран-при турнирида дунёнинг 32 мамлакатидан 215 нафар дзюдочи иштирок этади. Мусобақада юртимиз шарафини 56 нафар спортчимиз ҳимоя қилади.
Ушбу спорт анжумани Халқаро дзюдо федерацияси мусобақалари тақвимига киритилган Гран-при туркумидаги нуфузли халқаро турнирдир. Халқаро федерацияси қарорига кўра, дзюдочилар юқори нуфузли турнирларда рейтинг очколарини жамғариб боради. Спорт оламининг энг нуфузли мусобақаси – Олимпия ўйинлари иштирокчилари ҳам айнан ана шу рейтинг жадвали асосида сараланади.
Бу йилги Тошкент Гран-присида ҳам дунёнинг қатор мамлакатларидан энг сара дзюдочилар гиламга чиқиши кутилмоқда. Улар орасида Олимпия ўйинлари, жаҳон ва қитъа чемпионатларида ғолиб ва совриндор бўлган спортчиларнинг борлиги беллашувларнинг кескин ва муросасиз ўтишига хизмат қилади.
