Avvalroq, Germaniyaning “Bavariya” klubi italiyalik tajribali mutaxassis Karlo Anchelotti qattiqqo‘l emasligi va mashg‘ulotlarni yaxshi olib bormasligi ro‘kach qilinib, o‘z lavozimidan bo‘shatib yuborilganligi haqida xabar bergandik.
 
Bugun, 6 oktyabr kuni “Bavariya” rahbariyati germaniyalik mutaxassis Yupp Xaynkesni bosh murabbiylikka qaytganini rasman e’lon qildi.
 
Germaniyaliklar 72 yoshli murabbiy bilan mavsum so‘nggiga qadar mo‘ljallangan shartnoma imzolashdi. Xaynkes 9 oktyabrdan boshlab ishga kirishadi.
 
Ma’lumot uchun, Yupp Xaynkes faoliyati mobaynida uchinchi bor “Bavariya” boshqaruviga qaytdi. Xaynkes bundan avval 2009, 2011–2013 yillari “Bavariya”da bosh murabbiy sifatida ish olib borgan.
 
Yup Xaynkes boshchiligida “Bavariya” 2013 yil Germaniya futboli tarixida ilk treblni qayd etgan. O‘shanda myunxenliklar Bundesliga, Germaniya Kubogi va YECHLda g‘olib chiqishgandi.
 
Ayni damda “Bavariya” 7-turdan so‘ng 14 ochko jamg‘arib, musobaqa jadvalining 2-o‘rnini egallab turibdi.