O‘zbekiston Kubogi-2017 yarim finali javob uchrashuvidan so‘ng bo‘lib o‘tgan matbuot anjumanining dastlabki qismida “Lokomotiv” jamoasi bosh murabbiyi Andrey Miklyayev ishtirok etdi. A.Miklayayev o‘yin haqida quyidagi fikrlarini bildirdi.
-Bugun finalda o‘ynashga loyiq bo‘lgan ikki jamoa bahs yuritdi. “Nasaf” ham chempionatimizdagi eng yaxshi jamoalardan biri. Umuman olganda finalga chiqqanimizdan mamnunman.
Bugun biroz boshqacha uslubda o‘ynadik. Sababi, “Nasaf” natijadan kelib chiqib, oldinga o‘tishi aniq edi. Bizning asosiy maqsadimiz dastlabki 15 daqiqa davomida gol o‘tkazib yubormaslik edi. Chunki jamoada yosh va tezkor futbolchilar ko‘pchilikni tashkil etadi.
Ko‘rdingiz, stadionda jamoani muxlislar qanday qo‘llab-quvvatlashdi. Bu orqali jamoaga ular qo‘shimcha kuch bag‘ishlashadi. Bunday holatda mezbonlar ko‘proq gol kiritishlari mumkin. Shularni hisobga olib shunday o‘ynashga majbur bo‘ldik.
Chempionat bilan kubok o‘yinining farqi bor. Bugun bizning oldimizga qo‘ygan maqsadimiz boshqa edi. Bugun biz ochiq futbol o‘ynaganimizda “Nasaf”ga oson bo‘lar edi. Shaxsan menga “Nasaf”ning keyingi ko‘rsatayotgan o‘yinlari juda yoqadi, buni tan olish kerak.
