Ispaniya terma jamoasi o‘zining JCH-2018 uchun saralash musobakasiga tayyorgarlik o‘yinini o‘tkazganida mashg‘ulotni tomosha qilgani kelgan yuzlab muxlislar “Barselona” himoyachisi Jerard Pikeni kuchli bosim ostida qoldirishdi. Futbolchi tinmay buyum uloqtirayotgan yoki haqorat qilib o‘tirgan fanatlar oldida o‘ynashga jami 23 daqiqagina tob bera olgan, xolos. Shundan so‘ng qo‘riqchilarning yordami bilan maydondan tark etgan.
Terma jamoaning ajralmas bo‘lagiga aylanib bo‘lgan, dunyoning eng kuchli himoyachilaridan bo‘lmish Jerard Pikega muxlislarning bunday muomala qilishi sababi, aslida Ispaniya “La liga”sining yettinchi turidan so‘ng futbolchining o‘zi bergan intervyuga borib taqaladi. La liganing 7 turida “Barselona” “Las Palmas”ni qabul etgan, o‘yindan so‘ng esa Pike Kataloniyaning mustaqilligi bilan bog‘liq referendiyum borasida fikrlarini bildirgan. Jumladan, suhbatda Pike beixtiyor ko‘zlariga yosh olib, yurtining mustaqilligi uchun lozim bo‘lsa, Ispaniya terma jamoasidagi karyerasiga nuqta qo‘yishga ham tayyor ekanini aytgandi.
