Oliy liganing 26-turida "Paxtakor" Toshkent derbisida "Bunyodkor"ni qabul qiladi.

"Bunyodkor"ga qarshi o‘yinlar hamisha keskin kurashlar ostida kechadi. Ilk derbilardanoq bellashuvlar katta qiziqish keltirib chiqargan. Bu safar ham mustasno bo‘lmasligi aniq. Jamoalar sovrinli pog‘onalardan o‘rin olish va Chempionlar ligasiga beriladigan yo‘llanma uchun kurash olib borishmoqda. O‘yinda diskvalifikasiya sababli maydonga tusha olmaydigan futbolchilar yo‘q.

Oliy ligada jamoalar 21 uchrashuvda maydonga tushishgan. Jamoamiz 5 bellashuvda zafar quchgan, 9 o‘yinda durang natija qayd etilgan va 7 to‘qnashuvda "Bunyodkor" g‘alaba qozongan. 19 gol urgan "Paxtakor" darvozasidan 25 to‘p olib chiqqan. Uydagi uchrashuvlarda 3 g‘alaba, 6 durang va 1 mag‘lubiyat qayd etilgan.

Bellashuvda Aziz Asimov boshchiligidagi hakamlar guruhi ishlaydi. Oliy ligada Asimov jamoamiz ishtirokidagi 15 o‘yinni boshqargan. Ularda "Paxtakor" 10 g‘alaba va 1 durangga erishib, 4 mag‘lubiyatga uchragan. Joriy mavsum "Neftchi" dog‘da qoldirilgan va "Sho‘rtan"ga imkoniyat boy berilgan uchrashuvlarni Asimov boshqargan.

"PAXTAKOR" – "BUNYODKOR"
Hakamlar: Aziz Asimov (Toshkent), Aleksandr Sidorov (Toshkent), Doniyor Saylavov (Toshkent), Akobir Shukurullayev (Toshkent).
Nazoratchi: Farhod Abdullayev (Toshkent).
PFL vakili: Noil Lutfulin.

Yoshlar tarkiblari uchrashuvi 25 oktyabr, chorshanba kuni 15:00da "Jar" stadionida start oladi. Asosiy jamoalar o‘yini 26 oktyabr, payshanba kuni 18:00da "Paxtakor" stadionida boshlanadi.