Italiya terma jamoasi bosh murabbiyi Jampyero Ventura agar jamoani JCH-2018 musobaqasiga olib chiqa olmasa o‘z postini tark etishi mumkin.
Juma kuni italiyaliklar Shvesiyaga qarshi safar o‘yinida 0:1 hisobida imkoniyatni boy berishdi. Aynan mana shu mag‘lubiyatdan so‘ng Venturaning kursisi qimirlashi haqida xabarlar tezkorlik bilan tarqalmoqda.
Agar Ventura iste’foga chiqadigan bo‘lsa, uning o‘rnini “Bavariya” sobiq murabbiyi Karlo Anchelotti bosishi mumkin. Bundan tashqari, mazkur lavozimga “Chelsi” ustozi Antonio Konte va Italiya yoshlar termasini boshqaradigan Luiji di Badjo kabi nomzodlar bor.
Eslatib o‘tamiz, 69 yoshli mutaxassis avgust oyida Italiya futbol federasiyasi bilan 2020 yilga qadar shartnomasini uzaytirgandi.
