Yangilangan O‘zbekiston terma jamoasi o‘zining dastlabki o‘rtoqlik uchrashuvini o‘tkazdi. Alberto Dzakkeroni boshchiligidagi Amirlik termasi o‘z maydonida terma jamoamizni mag‘lubiyatga uchratdi.

Uchrashuvning 15-daqiqasida mezbonlar Ali Mabxutni yakkama-yakka vaziyatga chiqarib yuborishdi. Hujumchi Nesterovni aldab o‘tib, bo‘sh darvozani ishg‘ol qilishga muvaffaq bo‘ldi.

Ro‘ziqul Berdiyev boshchiligidagi terma jamoamiz ushbu tarkib bilan ilk o‘yinini o‘tkazgani bois, hali yuqori saviyada jamoaviy o‘yin namoyish qila olmadi. Vaqt o‘tgan sari, ayniqsa, ikkinchi bo‘limda O‘zbekiston BAA darvozasi oldida bir nechta vaziyatlarni yuzaga keltirdi, ammo ulardan foydalanish futbolchilarimizga nasib etmadi. Bahs so‘ngida Azizjon G‘aniyev yo‘llagan jarima zarbasi ancha xavfli bo‘ldi. To‘p Xolid Eysaning qo‘li va to‘singa tegib, maydonni tark etdi.

Shu tariqa, uchrashuv startida kiritilgan to‘p BAA terma jamoasiga g‘alaba keltirdi.

O‘rtoqlik uchrashuvi

Al-Ayn, “Xalifa bin Zayd” stadioni

BAA – O‘zbekiston 1:0

Gol: Ali Mabhut (16)

O‘zbekiston: Ignatiy Nesterov, Akmal Shorahmedov (SHuhrat Muhammadiyev, 52), Sherzod A’zamov, Rustam Ashurmatov (Islom To‘xtaxo‘jayev, 46), Akramjon Komilov (Farrux Sayfiyev, 46), Vladimir Kozak, Sardor Mirzayev (Dostonbek Hamdamov, 46), Odiljon Hamrobekov (Azizbek G‘aniyev, 46), Bahrom Abdurahimov (Ivan Nagayev, 72), Otabek Shukurov, Marat Bikmayev.

BAA: Xolid Issa, Salim Solih (Jassim Yoqub, 32), Xalifa Muborak, Amir Abdulrahmon, Mohnad Salim, Ali Ahmad Mabhut (Ahmad Al-Hoshmi, 89), Umar Abdulrahmon, Hamis Ismoil, Hamis Mahmud, Muhammad Favziy, Ismoil Ahmad.

Ogohlantirishlar: Akrom Komilov (24), Xalifa Muborak (37)

Hakam: Turki Muhammad Al-Huhayr (BAA)