Янгиланган Ўзбекистон терма жамоаси ўзининг дастлабки ўртоқлик учрашувини ўтказди. Альберто Дзаккерони бошчилигидаги Амирлик термаси ўз майдонида терма жамоамизни мағлубиятга учратди.
Учрашувнинг 15-дақиқасида мезбонлар Али Мабхутни яккама-якка вазиятга чиқариб юборишди. Ҳужумчи Нестеровни алдаб ўтиб, бўш дарвозани ишғол қилишга муваффақ бўлди.
Рўзиқул Бердиев бошчилигидаги терма жамоамиз ушбу таркиб билан илк ўйинини ўтказгани боис, ҳали юқори савияда жамоавий ўйин намойиш қила олмади. Вақт ўтган сари, айниқса, иккинчи бўлимда Ўзбекистон БАА дарвозаси олдида бир нечта вазиятларни юзага келтирди, аммо улардан фойдаланиш футболчиларимизга насиб этмади. Баҳс сўнгида Азизжон Ғаниев йўллаган жарима зарбаси анча хавфли бўлди. Тўп Холид Эйсанинг қўли ва тўсинга тегиб, майдонни тарк этди.
Шу тариқа, учрашув стартида киритилган тўп БАА терма жамоасига ғалаба келтирди.
Ўртоқлик учрашуви
Ал-Айн, “Халифа бин Зайд” стадиони
БАА – Ўзбекистон 1:0
Гол: Али Мабҳут (16)
Ўзбекистон: Игнатий Нестеров, Акмал Шораҳмедов (Шуҳрат Муҳаммадиев, 52), Шерзод Аъзамов, Рустам Ашурматов (Ислом Тўхтахўжаев, 46), Акрамжон Комилов (Фаррух Сайфиев, 46), Владимир Козак, Сардор Мирзаев (Достонбек Ҳамдамов, 46), Одилжон Ҳамробеков (Азизбек Ғаниев, 46), Баҳром Абдураҳимов (Иван Нагаев, 72), Отабек Шукуров, Марат Бикмаев.
БАА: Холид Исса, Салим Солиҳ (Жассим Ёқуб, 32), Халифа Муборак, Амир Абдулраҳмон, Моҳнад Салим, Али Аҳмад Мабҳут (Аҳмад Ал-Ҳошми, 89), Умар Абдулраҳмон, Ҳамис Исмоил, Ҳамис Маҳмуд, Муҳаммад Фавзий, Исмоил Аҳмад.
Огоҳлантиришлар: Акром Комилов (24), Халифа Муборак (37)
Ҳакам: Турки Муҳаммад Ал-Ҳуҳайр (БАА)
