Мадриднинг «Реал» клуби дарвозабони Андрей Лунин бошқа клубга ўтиши мумкин.

Инсайдер Николо Скиранинг хабар беришича, 27 ёшли футболчининг хизматлари бир неча кун олдин «Ювентус»га таклиф қилинган. «Кекса синьора» вакиллари ушбу трансфер борасида ўйлаб кўрмоқда. Аввалроқ ҳам туринликларнинг «қаймоқранглилар» дарвозабонига қизиқиши ҳақида хабарлар тарқалган, аммо бу масала аниқ келишувгача етиб бормаган.

Андрей Лунин 2018 йилдан бери «Реал»га тегишли. Умуман олганда, украиналик дарвозабон мадридликлар сафида барча турнирларда 74 та учрашув ўтказиб, 91 та гол ўтказиб юборган. Ўтган мавсумда эса 12 марта майдонга тушиб, 21 та гол ўтказиб юборди. Футболчининг «қироллик» клуби билан амалдаги шартномаси 2030 йил ёзига қадар мўлжалланган.