“Манчестер Юнайтед”нинг собиқ скаути Николас Синалли Ўзбекистон терма жамоаси ҳимоячиси Абдуқодир Ҳусанов борасида қизиқарли маълумотни ошкор қилди. Asnew.kz нашрининг ёзишича, мутахассис ўз вақтида “қизил иблислар” раҳбариятига ўзбекистонлик футболчини сотиб олишни тавсия қилган.

47 ёшли мутахассис Ҳусановни U-20 Жаҳон чемпионатида кашф қилганини айтади. Унинг фикрича, ёш ҳимоячининг бир қатор устунликлари айнан “Манчестер Юнайтед”га асқотиши мумкин эди.

“Ўзбекистон ёшларининг Жаҳон чемпионатидаги ўйинларини кузатиб, дарҳол Ҳусановга эътибор қаратдим. Унинг учта хислати мени ҳайратга солди: тезлик, куч ва диққатни жамлай олиши. Ўшанда Абдуқодир "Манчестер Юнайтед"га тўла мос келишига ишончим комил эди. Қолаверса, бутун жамоаси ҳам чинакам жанговар ўйин кўрсатганди”, дейди Синалли.

Эслатиб ўтамиз, Ўзбекистон ёшлар терма жамоаси 2023-йилги мундиалда нимчорак финалгача етиб бориб, Исроилга имкониятни бой берганди (0:1).

Скаутнинг маслаҳатига қарамай, “Манчестер Юнайтед” ушбу трансферни амалга оширмади. Якунда эса Ҳусанов 2025-йилнинг январь ойида 40 миллион евро эвазига Франциянинг “Ланс” клубидан “Манчестер Сити”га кўчиб ўтди.

Маълумот учун, “Манчестер Сити” АПЛ жорий мавсумининг дастлабки 4 туридан сўнг 12 очко тўплаб, 2-ўринда бормоқда. “Манчестер Юнайтед” эса 4 очко билан 13-поғонани эгаллаб турибди.