“Manchester Yunayted”ning sobiq skauti Nikolas Sinalli O‘zbekiston terma jamoasi himoyachisi Abduqodir Husanov borasida qiziqarli ma’lumotni oshkor qildi. Asnew.kz nashrining yozishicha, mutaxassis o‘z vaqtida “qizil iblislar” rahbariyatiga o‘zbekistonlik futbolchini sotib olishni tavsiya qilgan.

47 yoshli mutaxassis Husanovni U-20 Jahon chempionatida kashf qilganini aytadi. Uning fikricha, yosh himoyachining bir qator ustunliklari aynan “Manchester Yunayted”ga asqotishi mumkin edi.

“O‘zbekiston yoshlarining Jahon chempionatidagi o‘yinlarini kuzatib, darhol Husanovga e’tibor qaratdim. Uning uchta xislati meni hayratga soldi: tezlik, kuch va diqqatni jamlay olishi. O‘shanda Abduqodir "Manchester Yunayted"ga to‘la mos kelishiga ishonchim komil edi. Qolaversa, butun jamoasi ham chinakam jangovar o‘yin ko‘rsatgandi”, deydi Sinalli.

Eslatib o‘tamiz, O‘zbekiston yoshlar terma jamoasi 2023-yilgi mundialda nimchorak finalgacha yetib borib, Isroilga imkoniyatni boy bergandi (0:1).

Skautning maslahatiga qaramay, “Manchester Yunayted” ushbu transferni amalga oshirmadi. Yakunda esa Husanov 2025-yilning yanvar oyida 40 million yevro evaziga Fransiyaning “Lans” klubidan “Manchester Siti”ga ko‘chib o‘tdi.

Ma’lumot uchun, “Manchester Siti” APL joriy mavsumining dastlabki 4 turidan so‘ng 12 ochko to‘plab, 2-o‘rinda bormoqda. “Manchester Yunayted” esa 4 ochko bilan 13-pog‘onani egallab turibdi.