«Barselona»ning sobiq futbolchisi Kristian Telyo kataloniyaliklar vingeri Lamin Yamalning klub tarixidagi avvalgi yulduzli tarkiblarda asosiy jamoadan joy olish imkoniyatlari haqida fikr bildirdi.

Yaqinda professional futbolchilik faoliyatini yakunlagan Telyoning ta’kidlashicha, Yamal hozirgi yuqori saviyasiga qaramay, 2012 yillardagi «Barselona»ning asosiy tarkibiga kirishda jiddiy raqobatga duch kelgan bo‘lardi.

Sobiq futbolchining fikricha, o‘sha davrda kataloniyaliklar hujum chizig‘ida jahon darajasidagi yulduzlar to‘p tepgani sababli akademiyadan chiqqan yosh futbolchilar uchun asosiy tarkibda mustahkam o‘rin egallash nihoyatda qiyin edi.

«Menimcha, Yamal asosiy tarkib futbolchisi bo‘lolmasdi. Uning bu darajaga yetishi juda qiyin kechardi.

Albatta, uning iqtidori va hozir namoyish etayotgan o‘yinlarini hisobga olsak, asosiy jamoaga qo‘shila olgan bo‘lardi. Ammo bu oson kechmasdi.

Axir biz Aleksis Sanches, Pedro, David Vilya, Leo Messi, Neymar kabi futbolchilar haqida gapiryapmiz.

Bunday o‘yinchilar bor jamoada akademiyadan yetishib chiqayotgan har qanday futbolchi uchun asosiy tarkibdan joy olish juda mushkul», — dedi Telyo.

Shu tariqa, «Barselona»ning sobiq vingeri Yamalning iqtidorini e’tirof etgan holda, klubning avvalgi yulduzli tarkibida raqobat hozirgidan ancha murakkab bo‘lishi mumkinligini ta’kidladi.