Madridning «Real» klubi hujumchisi Endrik qishki transferlar davrida jamoani tark etishi mumkin. Braziliyalik futbolchi faoliyatini Italiyaning «Milan» klubida davom ettirishga rozilik bergani xabar qilinmoqda.
Avvalroq «Milan» rahbariyati 20 yoshli hujumchini yanvar oyida ijara asosida o‘z safiga qo‘shib olishga qiziqish bildirayotgani ma’lum bo‘lgan edi.
La Gazzetta dello Sport nashrining yangi ma’lumotlariga ko‘ra, Endrik «Milan»ga o‘tish taklifini ma’qullagan. Endi transferning amalga oshishi asosan «Real» rahbariyatining qaroriga bog‘liq.
Agar Madrid klubi braziliyalik futbolchining ketishiga ruxsat bersa, «Milan» uning uchun asosiy tanlovga aylanadi.
Endrikning jamoani o‘zgartirish istagiga o‘yin amaliyoti yetishmayotgani sabab bo‘lishi mumkin.
20 yoshli hujumchi joriy mavsumda Ispaniya chempionati doirasida atigi bitta uchrashuvda maydonga tushdi va unda bor-yo‘g‘i to‘rt daqiqa harakat qildi.
Shu sababli futbolchi muntazam o‘yin amaliyotiga ega bo‘lish maqsadida boshqa klubga o‘tish imkoniyatini ko‘rib chiqmoqda.
Ma’lumot uchun, Endrikning «Real» bilan amaldagi shartnomasi 2030 yilga qadar mo‘ljallangan.
