Angliyaning “Manchester Siti” klubi bosh murabbiyi Xosep Gvardiola uning shogirdlari ketma-ket g‘alabalardan ruhlanib ketishsa yoki jamoaning keyingi natijalari qoniqarli bo‘lmasa, ularga jazo qo‘llashini aytib o‘tdi.

Aniqrog‘i, “Manchester Siti” futbolchilari o‘zlariga ko‘p ishonib yuborishsa, Gvardiola hazil tariqasida ularni o‘ldirishga ham tayyor ekanligini ta’kidladi.

“Jamoa natijalariga murabbiy javobgar hisoblanadi. Murabbiy natijani kimdan talab etadi? Albatta, futbolchilardan!

Agar ular tinmasdan qozonilayotgan g‘alabalar natijasida o‘zlaridan ketib qolishsa, men ularni “o‘ldirishga” ham tayyorman.

Mening jamoamda tartib o‘z o‘rnida, bunday bo‘lishiga ishonish qiyin. Chunki, “Manchester Siti”ga kelganimda birinchi ishimni aynan jamoa ichki muhitidagi tartibni mustahkamlashdan boshlaganman.

Ha, “Manchester Siti” balki yomon o‘yin o‘tkazar, balki bizni qaysidir jamoa mag‘lubiyatga uchratar, lekin men shogirdlarimning ko‘zlarida futbol o‘ynashlari uchun xohish ko‘rmasam, ular bilan keyin boshqacha gaplashib olaman”, deydi ispaniyalik mutaxassis.

Eslatib o‘tamiz, Xosep Gvardiola va uning “Manchester Siti”dagi germaniyalik shogirdi Leroy Sane Angliya Premyer-Ligasida oktyabr oyining eng ilg‘orlari bo‘lishgani haqida avvalroq xabar berib o‘tgandik.

Gvardiola ketma-ket ushbu sovrinni qo‘lga kiritgan bo‘lsa, Sane birinchi marta oyning “eng yaxshi futbolchisi” deya e’tirof etildi.

Bundan tashqari, “Manchester Siti” jamoasi Angliya chempionatining 12 turidan so‘ng eng yaqin ta’qibchisi “Manchester Yunayted”ni 8 ochko ortda qoldirib yakka peshqadam bo‘lib turibdi.

Shuningdek, “shaharliklar” Yevropaning kuchli 5 ta chempionatida mavsum boshidan buyon mag‘lubiyatga uchramagan yagona jamoa hisoblanishadi.