U-17 Osiyo kubogi chorak finalidan o‘rin olgan O‘zbekiston — Janubiy Koreya uchrashuvi haqiqiy dramatik ssenariy asosida kechdi. Murosasiz va keskin ruhda o‘tgan bahsda o‘smirlarimiz iroda namoyon etib, yarim final yo‘llanmasini qo‘lga kiritishdi.

Uchrashuvning dastlabki daqiqalaridanoq har ikki jamoa faol harakat qildi. Janubiy Koreya to‘p nazoratiga e’tibor qaratgan bo‘lsa, O‘zbekiston tezkor qarshi hujumlar orqali xavf yaratishga urindi. Ilk bo‘lim o‘rtalariga kelib koreyaliklar hisobni ochishga muvaffaq bo‘lishdi va o‘z jamoasini oldinga olib chiqdi.

O‘tkazib yuborilgan goldan keyin o‘zbekistonlik futbolchilar bosimni oshirdi. Hujumlarda faollik kuchaygani o‘z samarasini 41-daqiqada berdi. Ahror Ravshanbekov raqib darvozasini ishg‘ol qilib, hisobni tenglashtirdi. Birinchi bo‘lim so‘nggi daqiqalarida esa o‘sha Ravshanbekov yana bir bor o‘z mahoratini namoyon etdi va dubl qayd etib, O‘zbekistonni hisobda oldinga olib chiqdi.

Tanaffusdan keyin Janubiy Koreya yanada faol harakat qila boshladi. O‘zbekiston terma jamoasi murabbiylar shtabi tarkibga bir qator o‘zgarishlar kiritib, o‘yin tempini saqlab qolishga urindi. Maydonda kurash keskin tus oldi va har bir epizodda yuqori sur’at kuzatildi.

Bellashuvning hal qiluvchi pallalarida koreyaliklar bosimni yanada kuchaytirdi. Natijada 88-daqiqada raqib hisobni tenglashtirishga erishdi. Asosiy vaqt 2:2 hisobida yakunlangach, g‘olib nomi penaltilar seriyasida aniqlanadigan bo‘ldi.

Penaltilar seriyasida esa O‘zbekiston o‘smirlar terma jamoasi sovuqqonlik bilan harakat qildi. Futbolchilarimiz barcha zarbalarni aniq amalga oshirgan bo‘lsa, Janubiy Koreya bir marta xatoga yo‘l qo‘ydi. Shu tariqa, O‘zbekiston U-17 terma jamoasi dramatik bahsdan keyin yarim finalga yo‘l oldi.

Chigodayev jamoasi yarim finalda Yaponiyaga qarshi maydonga chiqadi. O‘yin 19 may kuni Toshkent vaqti bilan 20:00da boshlanadi.

U-17 Osiyo kubogi, chorak final
O‘ZBEKISTON - JANUBIY KOREYA - 2:2. Penaltilar seriyasi — 5:3
Gollar: Ahrorbek Ravshanbekov (41, 45+2) — Mun Ji-Xvan (22), An Sun-Xyun (88)