Fransiyaning “Brest” jamoasi “Paxtakor” himoyachisi Muhammadrasul Abdumajidovni o‘z safiga qo‘shib olmoqchi edi, biroq Toshkent klubi futbolchini sotishni istamadi.

Ma’lum qilinishicha, fransuz klubi himoyachini keyinchalik to‘liq sotib olish sharti bilan bir yillik ijaraga so‘ragan. Biroq “Paxtakor” rahbariyati hamda murabbiylar shtabi futbolchining legionerga aylanishiga qarshilik ko‘rsatgan va taklifni rad etgan.

Agar mazkur kelishuv ijobiy yakun topganida, bu O‘zbekiston chempionatidan to‘g‘ridan-to‘g‘ri Yevropaning top-5 ligalaridan biriga amalga oshirilgan ilk tarixiy transfer bo‘lar edi.

Ma’lumot uchun, Abdumajidov “Paxtakor” klubi tarbiyalanuvchisi hisoblanadi. U 2023-yildan beri “sherlar”ning asosiy jamoasida to‘p tepadi. Futbolchi joriy mavsum klub safida 19 ta uchrashuvda maydonga tushib, o‘z hisobiga 1 assistni yozdirib qo‘ygan. Uning Toshkent klubi bilan shartnomasi 2027-yilning oxiriga qadar amal qiladi. Transfermarkt portali Muhammadrasulning bozor qiymatini 600 ming yevroga baholagan.