Ispaniya futbol federasiyasi "Barselona"ning yosh iqtidori Xavi Espartni yaqindan kuzatmoqda. Bu haqda Mundo Deportivo xabar berdi.

19 yoshli futbolchi mavsumoldi tayyorgarlikdayoq yaxshi taassurot qoldirgan edi. La Liga start olgach esa u "Barselona"da barchani hayratga solib, asosiy tarkibda o‘z o‘rnini topdi.

Aslida o‘ng qanot himoyachisi hisoblangan Espart kutilmagan tarzda chap qanot himoyachisi pozisiyasida birinchi raqamli tanlovga aylandi.

U "Elche", "Atletik" va "Rayo Valyekano"ga qarshi g‘alabali uchrashuvlarda yuqori saviyada o‘ynab, murabbiylar shtabi ishonchini qozondi.

Espartning yorqin o‘yinlari Ispaniya terma jamoasi bosh murabbiyi Luis de la Fuente e’tiboridan ham chetda qolmadi. Ma’lumotlarga ko‘ra, mutaxassis futbolchining rivojlanishini shaxsan kuzatib bormoqda.

Yosh futbolchining universalligi ham uning katta ustunligi hisoblanadi. Espart himoyaning har ikki qanotida, yarim himoyada va hujumkor pozisiyalarda ham harakat qila oladi.

Endi asosiy savol — 19 yoshli futbolchi yaqin vaqt ichida Ispaniya milliy terma jamoasiga ilk chaqiruvni oladimi yoki yo‘q.