Франциянинг “Брест” жамоаси “Пахтакор” ҳимоячиси Муҳаммадрасул Абдумажидовни ўз сафига қўшиб олмоқчи эди, бироқ Тошкент клуби футболчини сотишни истамади.

Маълум қилинишича, француз клуби ҳимоячини кейинчалик тўлиқ сотиб олиш шарти билан бир йиллик ижарага сўраган. Бироқ “Пахтакор” раҳбарияти ҳамда мураббийлар штаби футболчининг легионерга айланишига қаршилик кўрсатган ва таклифни рад этган.

Агар мазкур келишув ижобий якун топганида, бу Ўзбекистон чемпионатидан тўғридан-тўғри Европанинг топ-5 лигаларидан бирига амалга оширилган илк тарихий трансфер бўлар эди.

Маълумот учун, Абдумажидов “Пахтакор” клуби тарбияланувчиси ҳисобланади. У 2023-йилдан бери “шерлар”нинг асосий жамоасида тўп тепади. Футболчи жорий мавсум клуб сафида 19 та учрашувда майдонга тушиб, ўз ҳисобига 1 ассистни ёздириб қўйган. Унинг Тошкент клуби билан шартномаси 2027-йилнинг охирига қадар амал қилади. Трансфермаркт портали Муҳаммадрасулнинг бозор қийматини 600 минг еврога баҳолаган.