"Barselona" yarim himoyachisi Dani Olmo "Atletiko" hujumchisi Xulian Alvaresning Kataloniya klubiga amalga oshmay qolgan transferi haqida fikr bildirdi.
"Har kimning o‘z orzusi bor. Menimcha, Xulian ham nimani xohlayotganini juda yaxshi bilardi. U o‘z orzusi uchun kurashdi, ammo sen nazorat qila olmaydigan tashqi omillar ham bo‘ladi", — deya Olmoning so‘zlarini Mundo Deportivo keltirdi.
"Barselona" yozgi transfer oynasida Alvaresga jiddiy qiziqish bildirgan va futbolchining o‘zi bilan besh yillik shartnoma shartlarini kelishib olgan edi.
Biroq transfer yo‘lidagi asosiy to‘siq "Atletiko"ning pozisiyasi bo‘ldi. Madrid klubi argentinalik hujumchini to‘g‘ridan-to‘g‘ri raqibi "Barselona"ga sotishdan bosh tortgan.
Shu bilan birga, "Atletiko" Alvaresni "Arsenal"ga qo‘yib yuborishga tayyor bo‘lgan, ammo futbolchining o‘zi London klubiga o‘tish variantini rad etgan.
