"Барселона" ярим ҳимоячиси Дани Ольмо "Атлетико" ҳужумчиси Хулиан Альвареснинг Каталония клубига амалга ошмай қолган трансфери ҳақида фикр билдирди.
"Ҳар кимнинг ўз орзуси бор. Менимча, Хулиан ҳам нимани хоҳлаётганини жуда яхши биларди. У ўз орзуси учун курашди, аммо сен назорат қила олмайдиган ташқи омиллар ҳам бўлади", — дея Ольмонинг сўзларини Mundo Deportivo келтирди.
"Барселона" ёзги трансфер ойнасида Альваресга жиддий қизиқиш билдирган ва футболчининг ўзи билан беш йиллик шартнома шартларини келишиб олган эди.
Бироқ трансфер йўлидаги асосий тўсиқ "Атлетико"нинг позицияси бўлди. Мадрид клуби аргентиналик ҳужумчини тўғридан-тўғри рақиби "Барселона"га сотишдан бош тортган.
Шу билан бирга, "Атлетико" Альваресни "Арсенал"га қўйиб юборишга тайёр бўлган, аммо футболчининг ўзи Лондон клубига ўтиш вариантини рад этган.
