«Real» bosh murabbiyi Joze Mourinyo 19 yoshli yarim himoyachi Tyago Pitarchning salohiyatini yuqori baholab, uni asosiy jamoada o‘ynashga tayyor deb hisoblashini aytdi.

«Menga “Kastilya”ning har bir futbolchisi yoqadi. Tyago esa bu jamoa darajasidan allaqachon o‘sib ketganini isbotladi. U menga juda yoqadi. Bizda, shuningdek, Arribas, Siriya, Sestero va zaxirada ikki nafar darvozabon ham bor. Tyago tayyor bo‘lganida asosiy tarkibning bir qismiga aylanadi va o‘yin amaliyotiga ega bo‘ladi», — deya Mourinyoning so‘zlarini keltiradi AS.

Portugaliyalik mutaxassis yosh futbolchi bilan ishlash jarayoni haqida hazilomuz fikr ham bildirdi.

«Men unga oyoqlaridagi mushaklar meniki bilan bir xil ekanini aytaman. Shuning uchun u mashg‘ulotlar orqali yana bir-ikki kilogramm vazn qo‘shishi kerak», — dedi Mourinyo.

O‘tgan mavsumda Pitarch La Ligada 10 ta uchrashuvda maydonga tushib, 2 ta golli uzatmani amalga oshirgan.