Xabaringiz bor, 25 noyabr shanba kuni Yaponiyaning Saytama shahridagi “Saytama 2002” o‘yingohida Osiyo Chempionlar ligasining ikkinchi finali bo‘lib o‘tadi. Unda Yaponiyaning “Urava Red Daymonds” jamoasi Saudiya Arabistonining “Al-Hilol” klubiga qarshi maydonga tushadi. Dastlabki final bahsi 1:1 hisobidagi durang bilan yakuniga yetgan.

Mazkur uchrashuvni FIFA referisi Ravshan Ermatov boshchiligidagi o‘zbekistonlik hakamlar brigadasi boshqarib boradi. Ermatovga qanotlarda Abduhamidullo Rasulov va Jahongir Saidov yordam berishadi. Zaxira hakami Ma’mur Saidqosimov. Darvoza ortidagi hakamlar esa Valentin Kovalenko va Ilgiz Tantashev.

 Mazkur final bahsini bevosita stadiondan kuzatib borish uchun O‘zbekiston Professional Futbol Ligasi bosh direktori Omon G‘ofurov OFK taklifiga ko‘ra Yaponiyaga jo‘nab ketdi.

PFL bosh direktori Yaponiyada OCHL finalini kuzatib borishdan tashqari Yaponiyaning Jey-ligasi (J League) rahbariyati bilan uchrashuv ham o‘tkazishi ko‘zda tutilgan.

Uchrashuv davomida O‘zbekiston Futbol Federasiyasi va Yaponiya Futbol Assosiasiyasi o‘rtasidagi kelishuv asosidagi hamkorlik masalalari muhokama qilinadi.

Shuningdek, O‘zbekiston Futbol Federasiyasi Xalqaro aloqalar boshqarmasi boshlig‘i o‘rinbosari Olim Arifov ham ayni paytda Yaponiyada bo‘lib turibdi.

Ertaga 24 noyabr kuni Tokio shahrida OFK Musobaqalarni o‘tkazish qo‘mitasining yig‘ilishi bo‘lib o‘tadi. Olim Arifov mazkur yig‘ilishda ishtirok etadi. Yig‘ilishda yil davomida OFK nomidan o‘tkazilgan  musobaqalar haqida hisobotlar tinglanadi. Shuningdek, 2019-2022 yillar davomida o‘tkaziladigan musobaqalar rejasi, jumladan, 2019 yil BAAda bo‘lib o‘tadigan Osiyo Kubogiga tayyorgarlik masalalari ko‘rib chiqiladi. Bundan tashqari, kelasi yili Malayziya va Indoneziya davlatlarida bo‘lib o‘tadigan Osiyo Chempionati U-16 va U-19 musobaqalariga doir masalalar muhokama qilinadi.