O‘zbekiston Futbol Federasiyasi «Digital Panda» kompaniyasi bilan hamkorlikda keng ko‘lamdagi aksiya o‘tkazishga hozirlik ko‘rmoqda.
O‘zbekistonda turli sohalar kundan-kunga rivojlanmoqda, shu bilan birga futbolimiz ham yangi bosqich arafasida. O‘zbekiston Futbol Federasiyasi islohotlar orqali yurtimizda eng ommabop sport turi hisoblangan futbolni yuqori bosqichga olib chiqishga harakat qilmoqda.
Bu borada qator chora-tadbirlar bilan birgalikda O‘zbekiston Futbol Federasiyasi logotipini o‘zgartirish, shu bilan birga, kelasi yildan tashkil etiladigan Superliga va Pro-ligalar uchun ham yangi logotip yaratishga qaror qildi.
Agarda siz bu tarixning bir bo‘lagi bo‘lishni va futbolimiz rivojiga o‘z hissangizni qo‘shishni istasangiz, bunday imkoniyatni qo‘ldan boy bermang. Shu yilning 1 dekabridan boshlanadigan tanlovda Siz o‘z variantlaringizni taqdim etib, qimmatbaho sovrinlar yutib olishingiz va albatta futbolimiz tarixiga kirishingiz mumkin.
Xabarlarimizni kuzatib boring, futbolimiz rivojiga o‘z hissangizni qo‘shish Sizning qo‘lingizda!
«Digital Panda» kompaniyasi haqida qisqacha ma’lumot: Ushbu kompaniya 2015 yildan beri yurtimizda raqamli marketing sohasini rivojlantirishga o‘z hissasini qo‘shib kelmoqda. 2017 yildan boshlab «Digital Panda» “Mail.ru Group” kompaniyasining O‘zbekistondagi eksklyuziv vakili sifatida faoliyat yuritmoqda. Shuningdek, «Digital Panda» “Ucell”, “Beeline”, “UMS”, “Artel”, “Meva”, “Uzdigital TV”, “Dolce & Gabbana”, “TPS”, “Uzmobile”, “Mediapark”, “Multi Mafe”, “Samsung” kabi brendlar bilan hamkorlikda ish olib boradi.
