La Liga chempioni «Barselona» mavsumni mag‘lubiyat bilan yakunladi. Kataloniyaliklar 38-tur doirasida safarda «Valensiya»ga qarshi bahs olib borib, 1:3 hisobida imkoniyatni boy berishdi. O‘yinni yaxshi boshlagan va hisobni ochgan «ko‘k-anorranglilar» yakunda irodasizlik ko‘rsatishdi.

Bosh murabbiy Xans-Diter Flik o‘yindan keyingi matbuot anjumanida shogirdlarining o‘yinidan noroziligini yashirmadi:

«Biz juda ahmoqona xatolarga yo‘l qo‘ydik. Raqib g‘alabani bizdan ko‘ra ko‘proq istagani uchun yutib ketdi. Mavsumni bunday yakunlaganimizdan noroziman, ammo bu umumiy natijalarimizga ta’sir qilmaydi. Bugun futbolchilarimiz 100 foiz jam bo‘la olishmadi. Buni tushunish mumkin: ikki haftadan buyon chempionlikni nishonlayapmiz, oldinda esa Jahon chempionati turibdi. Lekin bu «Barselona» — bu yerda bunday loqaydlikka yo‘l qo‘yib bo‘lmaydi. Kelasi mavsum boshida har bir futbolchi o‘ta mas’uliyatli va jam bo‘lgan holda maydonga tushishini istayman», — dedi nemis mutaxassisi.

Eslatib o‘tamiz, «Barselona» mavsumni 94 ochko bilan birinchi o‘rinda yakunladi. Madridning «Real» klubi esa 86 ochko bilan ikkinchi pog‘onada qoldi.