«Liverpul»ning sobiq sardori Stiven Jerrard jamoa yozgi transfer oynasi yopilishidan oldin tayanch yarim himoyachi xarid qilishi kerak, deb hisoblaydi.

Uning fikricha, 2023 yilda Fabinyo klubni tark etganidan buyon «Liverpul» oltilik pozisiyada haqiqiy mutaxassis yetishmasligini his qilib kelmoqda.

«Bir pozisiya borki, unga deyarli e’tibor qaratilmadi. Faqat so‘nggi haftada, «Nyukasl»ga qarshi o‘yindan keyin bu haqda ko‘proq gapirila boshlandi. Menimcha, ularga 6-raqamli pozisiyada maxsus o‘ynaydigan futbolchi kerak», — dedi Jerrard.

«Albatta, murabbiy jamoaning qanday o‘ynashi va o‘z falsafasi borasida boshqacha fikrda bo‘lishi mumkin. Ammo menimcha, bu jamoaga markazni ushlab turadigan, raqib hujumlarini buzadigan haqiqiy «vayronkor» yetishmayapti. Fabinyo ketganidan beri bu pozisiya jamoa tuzilmasida juda katta bo‘shliq qoldirdi.

Menimcha, bu rol juda sezilarli darajada yetishmayapti va hozirgi tarkibda bu vazifani mutaxassis sifatida bajaradigan futbolchi yo‘q.

Shunday o‘yinchi Dominik Soboslai, Rayan Gravenberx va Aleksis Mak Allister kabi futbolchilarga hujumlarga ko‘proq qo‘shilish imkonini beradi, himoya chizig‘ini esa ancha ishonchli qiladi. Menimcha, «Liverpul» bu pozisiyaga juda muhtoj», — deya qo‘shimcha qildi Jerrard.