"Barselona" hujumchisi Lionel Messi tajribasi ortgani sayin murabbiy qarorlarini to‘g‘ri tushunayotganini ma’lum qildi.
Oxirgi o‘yinlarda kataloniyaliklar ustozi Ernesto Valverde argentinalik futbolchini bir necha marta zaxirada qoldirmoqda va buni futbolchining hordiq chiqarishi bilan tushuntirmoqda.
"Mavsum uzoq, yil davomida bosim kuchaygan vaqtlar bo‘lishini tushunyapman. Yillar o‘tib sening tanang ko‘p o‘tkazilgan o‘yinlar tufayli bosimni his qilar ekan. Natijada ba’zan maydonga tushmay turish ma’qulligini angladim", - deydi Messi.
