Yurtimizda faoliyat yuritayotgan «Yunior» bolalar futbol klubi tashkil etilganiga hali ko‘p vaqt bo‘lmadi. Lekin ushbu jamoa erishayotgan yutuqlar tahsinga loyiq.

«Yunior» FK xalqaro tarmoq ko‘rinishida bo‘lib, dunyoning 14 mamlakatida faoliyat yuritadi. Asosan Rossiya hamda MDHning boshqa davlatlarida filiallari bor. Bosh ofisi esa Sankt-Peterburg shahrida joylashgan.

Yaqinda mazkur jamoa Hindiston va Xitoyda ham ish boshladi. Shu yilning fevral oyida Toshkent shahrida ham ushbu klubning filiali ochildi. «Yunior»ga futbolchilar 3 yoshdan boshlab qabul qilinadi.

Jamoaning yosh tarbiyalanuvchilari Rossiyaning Qozon shahrida o‘tkazilgan turnirda muvaffaqiyatli qatnashib, sovrinli o‘rinlarni egallab qaytishdi.

Biz musobaqa taassurotlari bilan o‘rtoqlashish maqsadida jamoa bosh murabbiyi Temur Yafarovni suhbatga tortdik.

- Ushbu turnir Junior jamoasining turli mamlakatlarda faoliyat yuritayotgan filiallari o‘rtasida tashkil etildi, - deya so‘z boshladi suhbatdoshimiz. - Bu an’anaviy musobaqa bo‘lib, unda 14ta davlat vakillari qatnashishdi.

E’tiborlisi, mazkur turnirda to‘g‘ridan-to‘g‘ri ishtirok etishning imkoni yo‘q. Ya’ni, saralash bahslarida g‘olib chiqqan jamoalar final bosqichida qatnashish huquqini qo‘lga kiritishdi.

Bizning tarbiyalanuvchilar ham may oyida o‘tkazilgan saralashda muvaffaqiyat qozonishdi. Bahslarga Rossiyaning Sankt-Peterburg shahri mezbonlik qildi. Musobaqa saralashini munosib tarzda o‘tkazib, yo‘llanmani qo‘lga kiritdik.

Yaqinda Qozon shahrida turnirning final bosqichi o‘tkazildi. U yerda 12ta jamoa o‘zaro bosh mukofot uchun kurashga kirishdilar. Biz 2008 va 2010 yillarda tug‘ilgan futbolchilardan iborat ikki tarkibimiz bilan qatnashdik.

Natija yomon bo‘lmadi va jamoamiz kumush medalga sazovor bo‘ldi. Tashkil etilganligi jihatidan bizning bolakaylar turnirdagi eng yoshi edilar. Raqiblar esa kamida 2-3 yildan beri turli darajadagi turnirlarda qatnashib kelishayotgandi.

Shu sababli ham futbolchilarimiz erishgan natija bilan faxrlansak arziydi. Bu endi boshlanishi. Ishonchim komilki, vakillarimiz yanada yuksakroq yutuqlarga erishishadi.

- Qaysi jamoalarga qarshi maydonga tushdinglar, natijalar qanday bo‘ldi?

- Yakutsk jamoasini 5:0, mezbonlar - Qozon shahri vakillarini 3:0, Samara futbolchilarini 2:1, Yoshkar-olaliklarni 2:0 hisobida mag‘lub etdik.

Hal qiluvchi final uchrashuvida esa anchagina kuchli bo‘lgan Sankt-Peterburg jamoasiga 0:3 hisobida imkoniyatni boy berib qo‘ydik. Ana shu mag‘lubiyat ham futbolchilarimizning tajribasi oshishiga xizmat qiladi, ular mana shunday o‘yinlarda toblanishadi.

Bundan tashqari, bir nechta nominasiyalar bo‘yicha tarbiyalanuvchilarimiz eng yaxshilar qatorida e’tirof etildilar. Turnirning eng yaxshi himoyachi va hujumchisi, musobaqa to‘purari ham aynan bizning jamoadan bo‘ldi.

Final bosqichining barcha o‘yinlari Qozon shahridagi «Rubin» klubiga tegishli «Kazan Arena» stadionining sun’iy qoplamali yopiq manejida o‘tkazildi. Endi jamoamiz haqida qisqacha ma’lumot berib o‘tsam.

«Yunior» FK shu yilning fevral oyida ochilgan. Gulnora Gimayeva klubimiz direktori hisoblanadi. Junior futbol maktablari tarmog‘i 3 yoshdan 14 yoshgacha guruhlarda futbolchilarga millionlar o‘yini sir-asrorlarini o‘rgatib kelmoqda. Shaxsan o‘zim ham bolalar bilan ishlashdan zavq olyapman.

- Mashg‘ulotlar chog‘ida yangi, zamonaviy o‘quv texnologiyalardan ham foydalanyapsizlarmi?

- Rossiya futboli metodikasi asosida mashg‘ulotlar o‘tkazamiz. «Yunior» xalqaro futbol maktabining bosh metodisti Yevgeniy Gerasimes bo‘lib, u Toshkentga ham kelgan. Aynan uning ko‘rsatmalari asosida mashg‘ulotlarni yo‘lga qo‘yganmiz.

Bu mutaxassis «Valensiya», «Olimpiakos», «Sporting» klublarida malaka oshirgan. Bizning jamoa murabbiylariga ham «master-klass», ya’ni mahorat saboqlari darslarini o‘tgan. Murabbiylarning kvalifikasiyasini oshirib borishga alohida e’tibor qaratiladi.

- Futbol maktabiga bolalar qanday talablar asosida qabul qilinadi?

- Bizning ta’lim maskanimizda mahalliy murabbiylar bilan bir qatorda rossiyalik mutaxassislar ham faoliyat yuritishadi. Bolalarga kamida «S» lisenziyasiga ega bo‘lganlar saboq bera olishadi.

Murabbiylar attestasiya orqali qabul qilingan, ularning hammasi professional futbolchi sifatida to‘p surishgan. Ya’ni, zarur bo‘lgan yo‘lni bosib o‘tishgan. Boshlanishiga kichik yoshdagi guruhlarimizga barcha xohlovchilarni qabul qilamiz.

Ma’lum vaqt o‘tganidan keyin ularning o‘zlari saralanib qoladi. Futbolchi bo‘lib yetishishiga ko‘zimiz yetgan bolalarni shug‘ullantirishda davom etamiz. O‘ziga yarasha imtihonlarimiz bor.

Qolaversa, bizda bir murabbiy ko‘pi bilan 8 nafar bolaga saboq bera oladi. Bitta yosh guruhida kamida ikki mutaxassis ishlaydi. Bolalar uch yoshdan qabul qilinadi.

Bu yoshda bola o‘yinqaroq bo‘ladi. Shundan kelib chiqib, mashg‘ulotlarni asosan o‘yin tarzida olib borishga harakat qilamiz. Aynan 3 yoshli bolalar uchun mo‘ljallangan 2x2 ko‘rinishidagi futbol o‘yinlarimiz bor.

- Mamlakatimizning boshqa klublari bilan ham nazorat o‘yinlari o‘tkaziladimi?

- Albatta. Busiz iloj yo‘q. Bolalar uchun o‘yin amaliyoti juda muhim.

Asosan poytaxtimizda faoliyat yuritayotgan futbol klublarining tayyorlov guruhlari bilan nazorat o‘yinlari o‘tkazamiz. Tarbiyalanuvchilarimiz bir necha bor «Paxtakor» jamoasiga qarshi to‘p surishdi.

- «Yunior»ning kelgusidagi rejalari qanday?

- Nafaqat poytaxt, balki yurtimizning boshqa viloyatlarida ham jamoamiz filiallarini ochmoqchimiz. Maktabimizga farzandlarini berish istagida bo‘lgan ota-onalar bisyor.

Ularning talabini qondirish maqsadida ham ana shunday bo‘limlarni ochishimiz kerak. Kelasi yili iste’dodli futbolchilarni xorijdagi Junior jamoalarida mahorat oshirish uchun jo‘natishni rejaga kiritganmiz.

O‘z navbatida, murabbiylar ham malakalarini hamkor klublarda oshirib qaytishadi.

K.ALIMOV suhbatlashdi