Bu yil PRO-Ligada ishtirok etishi kutilayotgan “Sho‘rtan” jamoasi ham nihoyat kuni kecha, yana ham aniqrog‘i 18 yanvardan e’tiboran G‘uzordagi o‘z qarorgohida yangi mavsum uchun dastlabki tayyorgarlikni boshladi. Kuniga ikki mahaldan olib borilayotgan mashg‘ulotlar davomida murabbiylar asosiy e’tiborni futbolchilarning tiklanish jarayonlariga qaratishmoqda.

Dastlabki ikki kun davomida murabbiylar mahalliy yosh va o‘tgan yili yoshlar tarkibida o‘zini ko‘rsatgan futbolchilar bilan mashg‘ulot olib borishdi. Bugun kunning ikkinchi yarmida “Oq bo‘rilar” qarorgohiga o‘tgan mavsum tarkibdagi yetakchi va tajribali futbolchilar bo‘lgan Alibek Turobov, Ruslan Melzeddinov, Otabek Narzullayev, Hasanboy Ergashev, Olim Karimov, Shaxzodbek Xursanov, G‘ulom Rahmonov, Yusuf Bo‘riyev, Jasur Xolto‘rayevlar kelib qo‘shildi.
Futbolchilar bilan mashg‘ulotlarni jamoa murabbiylari – Bahodir Shoymardonov, Erkin Mirzayev hamda Akmal Saitqulovlar o‘tkazishmoqda.

Yig‘in davomida rejalashtirilgan sinov-nazorat uchrashuvlarining dastlabkisi 21 yanvar kuniga belgilangan. Shu kuni “Sho‘rtan” futbolchilari G‘uzorda “Mash’al” jamoasi yoshlar tarkibini qabul qilishadi.