Ushbu departamentga jami 23 ta federasiya a’zo bo‘ladi. Xabaringiz bor, hozirda noolimpiya sport turlarida ko‘plab mustaqil federasiyalar faoliyat yuritmoqda.
Masalan, taekvondo ITFning o‘zida to‘rtta mustaqil federasiya ish olib bormoqda. Karateda esa beshta federasiya ana shunday faoliyatni yo‘lga qo‘ygan. Bu departamentni tashkil etishdan ko‘zlangan asosiy maqsad ishlarni muvofiqlashtirish, hamkorlikda ishlash tizimini yaratish, o‘zboshimchalikka yo‘l qo‘ymaslik bo‘lib, eng avvalo olimpiya sport turlari uchun munosib zaxira, iqtidorli sportchilarni yetishtirib berish hisoblanadi.
Bugun Milliy olimpiya qo‘mitasida mazkur departament tashkil etilishiga bag‘ishlangan yig‘ilish bo‘lib o‘tdi. Departamentga Sardor Toshxo‘jayev direktor etib tayinlandi.
Yig‘ilishda MOQ Prezidenti Umid Ahmadjonov, Jismoniy tarbiya va sport vaziri Shoakram Isroilov va yangi departament direktori Sardor Toshxo‘jayevlar mustaqil ravishda faoliyat yuritayotgan federasiya a’zolari bilan uchrashishdi.
"O‘zbekistonlik ko‘pgina sportchilar Qirg‘iziston, Qozog‘iston va Rossiya kabi mamlakatlarga borib, o‘zlari mustaqil ravishda turli janglarda ishtirok etib kelishmoqda. Aralash qoidalar jangchilarini kim nazorat qilmoqda? Ular uchun kim javob beradi? Qaysi federasiya ularni kuzatib boradi? Bu haqida ham ma’lumotga ega emasmiz. Qolaversa, ayrim mustaqil federasiyalar davlatdan olgan mablag‘lari yetmagandek, ota-onalardan ham pul olib sportchilarni xorijiy musobaqalarga olib borishmoqda. Mablag‘ topib bera olmagan ota-onalar esa farzandlari harchand iqtidorli bo‘lmasin, ularni xalqaro musobaqlarga yuborish imkoniyatidan mahrum etilmoqda. Qani bu yerda adolat? Biz ana shunday xolatlarga chek qo‘yishimiz lozim. Eng avvalo, adolatli tizim yaratishimiz kerak. Toki, ota-onalar bizdan rozi bo‘lishsin", - deb kuyunib gapirdi MOQ Prezidenti Umid Ahmadjonov.
Departament qoshida alohida assosiasiyalar faoliyat yuritadi. Ya’ni o‘sha to‘rtta taekvondo federasiyasi bitta assosiasiyaga birlashtiriladi. Karateda ham huddi shunday yo‘l tutiladi. Ya’ni, shotokan, vodoryu, godzuryu federasiyalari bitta yaxlit assosiasiya ko‘rinishiga olib kelinadi. Aytib o‘tganimizdek, ushbu assosiasiyalar olimpiya sport turlari uchun sportchi yetishtirib berish bilan shug‘ullanadi.
“Eng muhimi, farzandlarini yakkakurash sport turlariga olib kelayotgan ota-onalar bizdan rozi bo‘lishi kerak. Asosiy maqsadimiz – yurtimizga mard va jasur, sog‘lom va baquvvat vatan himoyachilarini tarbiyalab berishdir", - dedi Umid Ahmadjonov.
Albatta, Milliy olimpiya qo‘mitasi qoshida Jang san’ati va yakkakurashlar departamentining tashkil etilishi ishni muvofiqlashtirishda, tartib o‘rnatishda, adolat mezonlarini yaratishda juda muhim ahamiyat kasb etadi. O‘ylaymizki, bu departament yaqin kelajakda o‘z samarasini beradi va olimpiya sport turlari sanalgan boks, dzyudo, taekvondo, karate, sport kurashlariga munosib sportchilarni yetkazib beradi.
