Bugun, 27 fevral kuni Toshkentdagi “Universal” sport majmuasida “World Series of Boxing” doirasida O‘zbekistonning “Uzbek Tigers” va Kubaning “Cuba Domadores” jamoalari o‘rtasida beshta jang bo‘lib o‘tdi.

Avvalroq, eng yengil vazn toifasida (49 kg.) Hasanboy Do‘smatov o‘zining jahon miqyosidagi asosiy raqibi Yoanis Argilagosga qarshi ringga ko‘tarilib, 3:0 hisobida yirik g‘alabaga erishgani haqida xabar bergandik.

Do‘stmatovdan so‘ng, -56 kg vazn toifasida Shahobiddin Zoirov Robeysi Ramiresga qarshi ringga ko‘tarildi.

Olimpiada chempioni hisoblanmish Shahobiddin Zoirov raqibini 2:0 hisobi bilan mag‘lubiyatga uchratdi.

Uchinchi jang -64 kg vazn toifasida Iqboljon Xoldorov va Endi Kruz o‘rtasida bo‘lib o‘tdi va Xoldorov raqibiga imkoniyatni boy berib qo‘ydi.

Xoldorovdan keyin -75 kg vazn toifasida Isroil Madrimov Arlen Lopezga qarshi jangini o‘tkazib, “Uzbek Tigers” jamoasining “Cuba Domadores” ustidan muddatidan oldin g‘alabasini ta’minlab berdi.

Boks kechasining so‘nggi jangida eng og‘ir vazn toifasidagi bokschilar – Sanjar Tursunov va Erislandi Savon ringga ko‘tarildi.

Tursunov ham jamoadoshlari kabi g‘alaba qozonish ishqida jangni ko‘tarinki kayfiyatda o‘tkazdi.

Sanjar yakunda yirik 3:0 hisobi bilan “Uzbek Tigers” jamoasining Kubaning kuchli jamoasi ustidan yirik hisobdagi g‘alabasiga hissasini qo‘shdi.

“Uzbek Tigers” – “Cuba Domadores” - 4:1.

Bugungi janglar:

-49kg: HasanboyDo‘smatov — YohannisArgilagos - 3:0.

-56kg: Shahobiddin Zoirov — Robeysi Ramires. - 2:0.

-64kg: Iqboljon Xoldorov — Endi Kruz - 1:2.

-75kg: Isroil Madrimov — Arlen Lopez 3:0.

-91kg: Sanjar Tursunov — Erislandi Savon 3:0.