Xabaringiz bor, O‘zbekiston futbol assosiasiyasi maydonida O‘FA tavsiyasiga binoan Toshkent shahar futbol federasiyasi tashabbusi bilan 2004 yilda tavallud topgan futbolchilar o‘rtasida "Navro‘z festivali" turniri o‘tkazilmoqda. Bugun ham ikkita uchrashuv tashkillashtirildi.
Avvaliga maydonda Namangandan kelgan "Odil Junior" poytaxtning “Spartak” jamoalari o‘zaro kuch sinashishdi. Deyarli teng kurashlar ostida kechgan o‘yinda yuzaga kelgan vaziyatlardan unumli foydalangan poytaxtliklar yirik hisobda yutuqqa erishishdi.
Ikkinchi o‘yin “Bunyodkor” va “Nasaf” futbol akademiyalari o‘rtasida kechdi. O‘z omadlarini raqiblar jarima maydoni ichidan izlagan qarshiliklar birinchi bo‘lib hisobni ochishdi ham. Ammo ko‘p o‘tmay o‘z jarima maydoni ichida o‘yin qoidasini buzishdi va yosh “qaldirg‘ochlar” penaltidan hisobni tenglashtirishdi.
Ikkinchi bo‘lim yanada qiziqarli o‘tdi. “Bunyodkor” yoshlari raqib bilan ikki-uch bor yakkama-yakka qolgan holda gol urishning uddasidan chiqa olmagan bo‘lsa, “Nasaf” a’zolari shuncha marotaba raqib jarima maydoni atrofida jarima to‘pi tepish imkoniyatiga ega bo‘lishdi, biroq zarbalarni golga aylantira olishmadi.
Eslatib o‘tamiz, mazkur jamoalar o‘rtasidagi uchrashuvlarni 14 yoshli o‘smirlar terma jamoasi bosh murabbiy Azamat Abduraimov boshchiligidagi seleksionerlar kuzatib borishmoqda. Maqsad, o‘smirlar terma jamoasiga nomzodlar saralab olish va kelasi yili o‘tadigan Osiyo chempionatida munosib ishtirok etish.
22 mart.
"Spartak" - "Odil Junior" – 4:1
"Bunyodkor" - "Nasaf" – 1:1
24 mart.
"Paxtakor" - "Odil Junior"
"Lokomotiv" - "Nasaf"
