Kecha Superliga 4-turidan o‘rin olgan ikki uchrashuv bo‘lib o‘tdi. “Bunyodkor” o‘z maydonida “Buxoro”ni qabul qildi va 3:1 hisobida g‘alaba qozondi. Qarshida “Nasaf” klubi “Metallurg” bilan 1:1 hisobida durang qayd etdi.
E’tiborlisi, “Bunyodkor” - “Buxoro” uchrashuvni kuzatish uchun stadionga 15 421 nafar tomoshabin tashrif buyurdi. Bu albatta yangi formatda tashkil etilgan Superliga uchrashuvlarining shiddatli va sog‘lom raqobat asosida o‘tayotganining mevasidir.
Hozircha uy uchrashuvlarida muxlis yig‘ish bo‘yicha “Bunyodkor” Superliga klublari ichida peshqadam bo‘lib turibdi. “Qaldirg‘ochlar” mart oyidagi uy uchrashuvlarida jami 48 032 nafar muxlis yig‘di.
“Nasaf” – “Metallurg” uchrashuvini tomosha qilish uchun esa Qarshi shahridagi “Markaziy” stadionga 14 300 nafar muxlis tashrif buyurdi.
Qayd etish kerakki, O‘zbekiston Futbol Assosiasiyasi hamda Professional futbol ligasi rahbariyati tomonidan futbolni yanada rivojlantirish borasida olib borilayotgan chora-tadbirlar Superliga bahslarining shiddatli o‘tishi bilan birgalikda muxlislarning stadionga qaytarishga ham xizmat qilmoqda.
