Кеча Суперлига 4-туридан ўрин олган икки учрашув бўлиб ўтди. “Бунёдкор” ўз майдонида “Бухоро”ни қабул қилди ва 3:1 ҳисобида ғалаба қозонди. Қаршида “Насаф” клуби “Металлург” билан 1:1 ҳисобида дуранг қайд этди.
Эътиборлиси, “Бунёдкор” - “Бухоро” учрашувни кузатиш учун стадионга 15 421 нафар томошабин ташриф буюрди. Бу албатта янги форматда ташкил этилган Суперлига учрашувларининг шиддатли ва соғлом рақобат асосида ўтаётганининг мевасидир.
Ҳозирча уй учрашувларида мухлис йиғиш бўйича “Бунёдкор” Суперлига клублари ичида пешқадам бўлиб турибди. “Қалдирғочлар” март ойидаги уй учрашувларида жами 48 032 нафар мухлис йиғди.
“Насаф” – “Металлург” учрашувини томоша қилиш учун эса Қарши шаҳридаги “Марказий” стадионга 14 300 нафар мухлис ташриф буюрди.
Қайд этиш керакки, Ўзбекистон Футбол Ассоциацияси ҳамда Профессионал футбол лигаси раҳбарияти томонидан футболни янада ривожлантириш борасида олиб борилаётган чора-тадбирлар Суперлига баҳсларининг шиддатли ўтиши билан биргаликда мухлисларнинг стадионга қайтаришга ҳам хизмат қилмоқда.
