Qatarning dunyoga mashhur “Aspire” futbol akademiyasi Osiyoning eng yaxshi akademiyalari tarbiyalanuvchilari ishtirokida tashkil etgan xalqaro turnir nihoyasiga yetdi.
Turnirga O‘zbekiston hamda Qatar futbol assosiasiyalari o‘rtasidagi memorandumga asosan, O‘zbekistondan ham futbolchilar taklif etilgan edi.
“Nasaf” futbol maktabi 2017 yil yakuniga ko‘ra O‘zbekistonning eng yaxshi akademiyasi sifatida e’tirof etilgani bois, Qatardagi turnirda ishtirok etdi.
Mazkur musobaqada “Nasaf” futbol maktabining 2000 yilda tug‘ilgan tarbiyalanuvchilaridan iborat jamoasi (murabbiylar: Nurali Sultonov, Nasim Shoyimov), 2001-2002 yilda tug‘ilganlar jamoasi (murabbiy: Pavel Kshnyakin) va 2003 yilda tavallud topgan tarbiyalanuvchilarimizdan iborat jamoasi (murabbiy: Umar Rahmatullayev va Jasur Ibragimov) ishtirok etishdi.
Kecha yosh "ajdarlar" "Aspire" akademiyasi tarbiyalanuvchilari bilan o‘rtoqlik uchrashuvlari ham o‘tkazishdi. Bu uchrashuv yosh "ajdarlar"ning g‘alabasi bilan yakunlandi.
Shuningdek kechaning o‘zida turnir g‘oliblarini taqdirlash marosimi ham o‘tkazildi. "Nasaf" tarbiyalanuvchilari turnirda uchinchi o‘rinlar bilan kifoyalanishdi.
“Nasaf” futbol maktabining tarbiyalanuvchisi, yosh darvozabon Asadbek Polvonov turnirning eng yaxshi darvozaboni sifatida e’tirof etildi.
"Nasaf"ning yosh futbolchilari bugun kechki payt yurtimizga qarab yo‘lga chiqishadi.
