Қатарнинг дунёга машҳур “Аспире” футбол академияси Осиёнинг энг яхши академиялари тарбияланувчилари иштирокида ташкил этган халқаро турнир ниҳоясига етди.

Турнирга Ўзбекистон ҳамда Қатар футбол ассоциациялари ўртасидаги меморандумга асосан, Ўзбекистондан ҳам футболчилар таклиф этилган эди.

“Насаф” футбол мактаби 2017 йил якунига кўра Ўзбекистоннинг энг яхши академияси сифатида эътироф этилгани боис, Қатардаги турнирда иштирок этди.

Мазкур мусобақада “Насаф” футбол мактабининг 2000 йилда туғилган тарбияланувчиларидан иборат жамоаси (мураббийлар: Нурали Султонов, Насим Шойимов), 2001-2002 йилда туғилганлар жамоаси (мураббий: Павел Кшнякин) ва 2003 йилда таваллуд топган тарбияланувчиларимиздан иборат жамоаси (мураббий: Умар Раҳматуллаев ва Жасур Ибрагимов) иштирок этишди.

Кеча ёш "аждарлар" "Аспире" академияси тарбияланувчилари билан ўртоқлик учрашувлари ҳам ўтказишди. Бу учрашув ёш "аждарлар"нинг ғалабаси билан якунланди.

Шунингдек кечанинг ўзида турнир ғолибларини тақдирлаш маросими ҳам ўтказилди. "Насаф" тарбияланувчилари турнирда учинчи ўринлар билан кифояланишди.

“Насаф” футбол мактабининг тарбияланувчиси, ёш дарвозабон Асадбек Полвонов турнирнинг энг яхши дарвозабони сифатида эътироф этилди.

"Насаф"нинг ёш футболчилари бугун кечки пайт юртимизга қараб йўлга чиқишади.