Samarqandning “Dinamo” klubi 20 aprel sanasida bir emas ikkita o‘yin o‘tkazayotgani masalasida bir qator tushunmovchiliklar bor ekanidan kelib chiqib, Professional futbol ligasi o‘z pozisiyasini tushuntiradi.

20 aprel sanasiga tayin qilingan “Dinamo” — “Mash’al” uchrashuvini boshqa kunga surishni so‘rab PFL Samarqand viloyati hokimiyatidan xat qabul qilib oldi, “Dinamo” futbol klubidan emas. Shunga ko‘ra, PFL Samarqand viloyati hokimiyatiga rasmiy javob xati yozib, rasmiy o‘yinni boshqa sanaga qoldira olmasligini tushuntirdi va o‘rtoqlik uchrashuvini taqvimdan bo‘sh vaqtda o‘tkazishni tavsiya qildi.

Keyin esa “Mash’al”ga qarshi uchrashuv PFL tomonidan “Dinamo”ning so‘rovidan kelib chiqib, 20:00 ga tayin qilindi. “Mash’al” futbol klubi ham bundan xabardor etildi. Shuningdek, muboraklik futbolchilar o‘yinoldi mashg‘ulotlari va boshqa tadbirlarni o‘tkazib olishlari uchun odatga ko‘ra sharoit yaratib berilishi vazifasi “Dinamo”ga yuklatildi. Unga qadar PFL komissari uchrashuvni boshlash uchun ruxsat bermagan.

PFL o‘rtoqlik o‘yinlaridan kelib chiqib, Superliga yoki Pro-Liga o‘yinlari sanasini surishni rejalashtirmagan. 2018 yilgi mavsumda taqvim anchagina zich ekanidan kelib chiqilsa, birgina o‘yinning surilishi holatga o‘zining salbiy ta’sirini ko‘rsatishi mumkin. Shuningdek, PFL bir kunda 2 ta uchrashuv o‘tkazish futbolchilar salomatligiga salbiy ta’sir ko‘rsatishi mumkin degan fikrni qo‘llab-quvvatlaydi. Bu holatni “Dinamo” rahbariyati ham tushunib, har ikki uchrashuvga aralash tarkibni tashlashi borasida PFL komissariga tushuntirish bergan. Qolaversa, Pro-Liga o‘yinlarida 5 nafargacha futbolchini almashtirish uchun imkoniyat taqdim etilgan.  

“Dinamo” musobaqalarni o‘tkazish reglamentini buzmaslik choralarini ko‘rib, “Xo‘jand” futbol klubiga qarshi uchrashuvning har bir taymi 35 daqiqadan o‘tishini rejalashtirgan.

Professional futbol ligasi va O‘zbekiston futbol assosiasiyasi Tojikiston bilan iliq aloqalar yo‘lga qo‘yilayotganini qadrlaydi. O‘FA birinchi vise-prezidenti Umid Ahmadjonov hamda Tojikiston futbol federasiyasi prezidenti Rustam Emomali o‘rtasida yaqindagina Dushanbeda uchrashuv o‘tkazilgan bo‘lib, unda ikki tomon o‘zaro hamkorlikda faoliyat olib borishi kelishib olgani bunga misol bo‘lishi mumkin. Ammo rasmiy uchrashuvlar sanasining o‘zgarmasligi maqsadga muvofiqdir. Qolgan kunlarda esa qo‘shni mamlakat jamoalari bilan kelishuvlarni bemalol amalga oshirish mumkin.