“Bunyodkor” – “Lokomotiv” uchrashuvidan keyingi matbuot anjumanining ikkinchi qismida “qaldirg‘ochlar” vakillari ishtirok etishdi.

- O‘yin haqida nima deyish mumkin? Nima bo‘lganda ham “Bunyodkor” oxirigacha kurashadi. O‘tgan turda Namanganda mag‘lubiyatga loyiq emasdik. Bugun ham o‘ylashimcha, yutqazishimiz kerak emasdi. Ochiq va tomoshabop o‘yin guvohiga aylandik. Chiroyli kombinasiyalar va hujumlar ko‘p bo‘ldi. Bundan eng avvalo stadionga kelgan ko‘p ming sonli ishqibozlar yutishdi, deb o‘ylayman. Stadionga kelib, jamoalarni qo‘llab-quvvatlagan muxlislarga katta rahmat deyman. Qilingan mehnatlar oxirgi daqiqalarda chippakka chiqqani alamli bo‘ldi. Bu kabi mag‘lubiyatlar bizni yanada kuchliroq qiladi, - deydi “Bunyodkor” ustozi Mirjalol Qo‘shoqovich.

- Bizni oson o‘yin kutmayotganini oldindan bilardik. Stadionga kelgan muxlislarga minnatdorchilik bildiraman. Jamoadoshlarim bilan g‘alaba qozonish uchun borimizni berdik. Ammo bu yetarli bo‘lmadi, - deydi “Bunyodkor” safida uchrashuvning eng yaxshi futbolchisi, deb topilgan Murodjon Zuhurov.