«Bavariya» hujumchisi Sandro Vagner Germaniya terma jamoasi safida 2018 yilgi jahon chempionatida ishtirok etmasligidan xabar topgach, o‘zini tutib tura olmasdan yig‘lab yuborgan.

Terma jamoa bosh murabbiyi Yoaxim Lyov uning o‘rniga Mario Gomesni jahon chempionatiga olib ketishni ma’qul ko‘rgan. 30 yoshli futbolchi bu haqida myunxenliklar klubi mashg‘ulotlari vaqtida xabar topgandi. 

Vagnerni «Bavariya»dagi jamoadoshlari va klub bosh murabbiyi Yupp Xaynkes qo‘llab-quvvatlagan. Xaynkes Lyovning o‘rnida bo‘lganida Vagnerni terma jamoaga chaqirgan bo‘lishini, uning qarorini tushunmaganini aytib o‘tgan.

Sandro Vagner mavsum yarmida «Hoffenhaym»dan «Bavariya»ga o‘tgandi. U mavsumda barcha turnirlar doirasida 34 uchrashuvda maydonga tushib, 15 gol urgan va 4 golga uzatma bergan.

Rossiyadagi jahon chempionati 14 iyundan 15 iyulga qadar bo‘lib o‘tadi. Germaniya termasi F guruhida Meksika, Shvesiya va Janubiy Koreya termalariga qarshi bahs olib boradi.